വരവിളി

മുയ്യം രാജന്‍

കാവിലെ ചെണ്ടമേളം കേട്ടാലറിയാം

ആരോ പുലിത്തെയ്യം കെട്ടിയാടുന്നുണ്ട്‌

കാലുകളില്‍ കനലാടാനുള്ള

വെളിച്ചപ്പാടിണ്റ്റെ വെമ്പല്‍

കാല്‍ച്ചിലമ്പ്‌, പള്ളിവാള്‍, പരിച,

അരമണിക്കിലുക്കം , നെറ്റിപ്പതക്കം

ചുവന്ന പട്ടിണ്റ്റെ തിളക്കം

ഉറഞ്ഞു തുള്ളുന്നുണ്ട്‌ !

മനസ്സിപ്പം നിശ്ചല ചിത്രങ്ങള്‍

മിന്നിമറയുന്ന തിരശ്ശീല !

താരകങ്ങള്‍ ആകാശദീപം

കൊളുത്തിയിട്ടുണ്ട്‌

മെയ്യില്‍ രാക്കുളിര്‌

കൂടുകൂട്ടിയിട്ടുണ്ട്‌

മേലേരിയ്ക്കരികില്‍ വെറും നിലത്ത്‌

ഉടുമുണ്ട്‌ ഊരിപ്പുതച്ച്‌

ഉറങ്ങാനെന്ത്‌ രസം ?

കനലാടിയവര്‍ തെറിപ്പിച്ച

ഒരു തീച്ചീളിപ്പം

നെഞ്ചിന്‍ നെരിപ്പോടില്‍

വസൂരിമാലപോലെ

വിങ്ങിപ്പഴുക്കുമ്പോള്‍

ഉറക്കപ്പിച്ചിങ്ങനെ

വരവിളി നടത്തും :

തെയ്യക്കോപം..തെയ്യശ്ശാപം ..!