സുരേഷ്‌ മൂക്കന്നൂർ
ഇരുപുറമില്ലിമുൾവേലിതീർക്കും
ഇടവഴിയൂടെയെൻതോഴരൊപ്പം
പതിവായി വിദ്യാലയത്തിലേക്കായ്‌
കഥകൾ പറഞ്ഞുനടന്നകാലം
സ്മൃതികളിൽ സൂക്ഷിച്ചിരിപ്പു ഭദ്രം
നിനവിലൂടൊന്നു കടന്നുപോകാൻ
മഴപെയ്തു കുത്തിയൊലിച്ച വെള്ളം
അണകെട്ടിനിർത്തിയതിൽക്കളിച്ചും
ചളികൊണ്ടുചന്ദനക്കുറിവരച്ചു
മണിയടിയൊച്ചകേട്ടൊന്നുഞ്ഞെട്ടി
ഇലചൂടിവിദ്യാലയം വരേയ്ക്കും
ധൃതിയിൽ നടക്കും കുസൃതികാട്ടി
വഴിനീളെ തിന്നുവാൻ കൈക്കലാക്കും
പല പല തൊടിയിലെ കായ്കനികൾ
കല്ലിലിടിച്ചങ്ങു കണ്ണിമാങ്ങ
കല്ലുപ്പു കൂട്ടിക്കടിച്ചുതിന്നും
ചാമ്പയും പേരയും ചില്ലതാഴ്ത്തി
ചാടിപ്പറിച്ചങ്ങുപങ്കുവച്ചും
കണ്ടചെടികൾതൻ കായ്പറിച്ചും
കയ്പും ചവർപ്പുമിനിപ്പുമെല്ലാം
കണ്ടുമറിഞ്ഞുമനുഭവിച്ചും
സംഘടിച്ചങ്ങിനെ സഞ്ചരിക്കെ
പള്ളിക്കൂടത്തിൻ പഠിപ്പിനേക്കാൾ
ഞങ്ങൾക്കീയാത്രകളുത്സവങ്ങൾ
