 | | |||
പട്ടടയൊരുങ്ങിയോ?
ചന്ദനം, മാവിന്‍ ചീളും
മെത്തപോല്‍ വിരിച്ചിട്ട
ദര്‍ഭയു,മെള്ളും പൂവും
വേദമന്ത്രങ്ങള്‍ ചൊല്ലി-
യമ്മയെക്കിടത്തിടും
ആതപം പൂണ്ടാ,ത്മാവി-
താരെയോ തീരഞ്ഞിടും!
ഇന്നലെ ബന്ധുക്കളോ-
ടമ്മ ചൊല്ലിപോല്‍ , “അവ-
നിങ്ങനെ നടപ്പോരില്‍
മുമ്പനാണു കേള്‍ക്കുന്നു,
എങ്കിലും സദാ നേരമെ-
ന്റെടുത്തിരുന്നവന്‍!"
സങ്കടങ്ങളെമറ-
ന്നമ്മ സായൂജ്യം കൊണ്ടു.
തെക്കിനിത്തുലാത്തൂണില്‍
താങ്ങിയും സമീപത്തെ
തിക്കിലും തിരക്കിലും
കണ്ണു നട്ടിതാ,യൊരാള്‍
വന്‍മതില്‍ക്കെട്ടും, കോട്ട -
കൊത്തളങ്ങളും തഴ,-
ഞ്ഞുള്ളിലെയുഡുക്കളെ
ദീപ്തമാക്കിയാള്‍, പിന്നെ
പിഞ്ഞിയ പൂണൂല്‍ക്കുരു-
ക്കൊന്നു വേര്‍പെടുത്തിടാന്‍
തുന്നിയ നവീനമാം
വിപ്ലവത്തീജ്ജ്വാലയില്‍
ചെന്നുപെട്ടതാണയാള്‍,
( വി ടി തന്‍ സഹോദരി-
ക്കന്നു വൈധവ്യം തീര്‍ത്ത-
ചരിത്രമുഹൂര്‍ത്തത്തില്‍. )
ജ്യേഷ്ഠനോ വിധിച്ചുപോല്‍
ഭ്രഷ്ടനാ,യിവന്‍ തീര്‍ച്ച
വേര്‍പിരിച്ചൊഴിച്ചിടാം,
‘ഭാഗ‘മാക്കണം വേഗം.
അന്നു പങ്കുവച്ചതാ,-
ണമ്മയെ, അയാള്‍ക്കൊപ്പം
പോന്നവര്‍ വ്യഥാകാലം
പങ്കുവയ്ക്കുവാന്‍ നൂനം.
താന്ത്രിക,രൊടുക്കത്തെ
വേദമന്ത്രണം തീര്‍ത്തു,
യാത്രയാക്കുവാന്‍ കോടി
ശീലയും പുതപ്പിച്ചു.
കാല്‍ക്കലും തലയ്ക്കലും
മൂത്തവര്‍ പിടിച്ചതും,
വായ്ക്കരികൊടുപ്പതും
നോക്കിനിന്നയാള്‍; പണ്ടേ
വറ്റ,യാള്‍ നിവേദിക്കേ
വ്യര്‍ത്ഥമാക്കാതെ,യമ്മ
അത്രയും ഭുജിച്ചതാണ-
പ്രമേയമാം കര്‍മ്മം.
മുന്നിലെ നഭസ്സിനെ
പൂഞ്ചായല്‍ പുതപ്പിക്കും
കര്‍മ്മരഥ്യകള്‍ നോക്കി
നിന്നയാ‍ള്‍ , കാലം കണ്ട
കുത്തൊഴുക്കുകള്‍, തീര്‍ത്ത
വര്‍ഗ്ഗ മുന്നേറ്റങ്ങളാല്‍
.
പുല്‍ക്കൊടിത്തുമ്പും തെഴു-
ത്തുയര്‍ക്കാന്‍ പഠിപ്പിച്ചു.
പിന്നെയാ,ത്രൈയക്ഷരി
മന്ത്രണ‘മീയെമ്മെസ്സാ‘യ്
വന്നു നില്‍ക്കൂന്നൂ, കാലം
കാത്തിടുന്നഭംഗുരം!
അവലംബം : ഇ എം എസ്സിന്റെ ആത്മകഥ
