വാര്‍ഷികബ്ലോഗുഫലം

അരുൺ കൈമൾ


മലയാള ബ്ലോഗുകള്‍ക്ക്‌ ‘ഗുമ്മു ‘ നഷ്ടപ്പെട്ടോ ? ബ്ലോഗിന് കഷ്ടകാലമോ ? ഇങ്ങനെയുള്ള ചോദ്യങ്ങള്‍ ബ്ലോഗ്ഗര്‍മാരുടെ ഇടയില്‍ തന്നെ ഉയരുകയും , അതിനു പരിഹാരമായി മലയാള ബ്ലോഗ്ഗിലെ കറവവറ്റിയ വിശുദ്ധ പശുക്കള്‍ പാല് ചുരത്തിയാലെ ‘ഗുമ്മു’ വരികയുള്ളു എന്നു നിര്‍ദേശം ഉയരുകയും ചെയ്ത വര്ഷം ആണ് രണ്ടായിരത്തി പതിനൊന്ന്. ഈ കഷ്ടകാലം ചിലര്‍ മാത്രം അനുഭവിക്കുന്ന നഷ്ടകാലം ആണോ എന്ന വിഷയവും ഏറെ ചര്‍ച്ച ചെയ്യപ്പെട്ടു .ഈ വർഷം തന്നെ ബൂലോകത്തിനു പുറത്തു അസഹിഷ്ണുക്കള്‍ ആയ ചില മുഖ്യധാര എഴുത്തുകാര്‍ ബ്ലോഗ്ഗിനു ‘ടോയ് ലെറ്റ്‌ സാഹിത്യം’ എന്ന പട്ടം ചാര്‍ത്തി കൊടുക്കുക വഴി ,പ്രസിദ്ധിയിലൂടെയോ കുപ്രസിദ്ധിയിലൂടെയോ , ശ്രദ്ധ പിടിച്ചുപറ്റുകയും ഉണ്ടായി .


അങ്ങനെ അന്തരിച്ച നമ്മുടെ ലീഡറുടെ ഭാഷയില്‍ പറഞ്ഞാല്, ‍ ‘ മുന്നില്‍ നിന്നും കുത്തി , പിന്നില്‍നിന്നും കുത്തി ‘ എന്ന അവസ്ഥയില്‍ മലയാളം ബ്ലോഗ്‌ നിലകൊള്ളുമ്പോള്‍ ആണ് പോയവര്‍ഷത്തെ മികച്ച പത്തു മലയാളം ബ്ലോഗ്ഗുകള്‍ തിരഞ്ഞെടുക്കാനുള്ള ഭാരിച്ച ഉത്തരവാദിത്വം ബൂലോകം ഓണ്‍ ലയിനിനു വേണ്ടി ഞാന്‍ ഏറ്റെടുക്കുന്നത് .പതിനായിരക്കണക്കിന് ബ്ലോഗുകളും , ലക്ഷക്കണക്കിന്‌ ചെറുതും വലുതും ആയ എഴുത്തുകാരും നിറഞ്ഞു നില്‍ക്കുന്ന ഈ മേഖലയില്‍ , എല്ലാ ബ്ലോഗ്ഗിലും ചുരുങ്ങിയ സമയം കൊണ്ട് എത്തിപ്പെടുക എന്നത് അസംഭാവ്യം ആയതിനാല്‍ , ബൂലോകം ഓണ്‍ലൈനില്‍ എഴുതുന്നവരുടെയും അല്ലാത്തവരുടെയും ആയ ഇരുന്നൂറു ബ്ലോഗുകള്‍ ബൂലോകം ഓണ്‍ ലയിന്റിന്റെ ഒരു സംഘം വായനക്കാര്‍ നിര്‍ദേശിച്ചു തരികയും ,ചുരുങ്ങിയ സമയത്തിനുള്ളില്‍ അവയെല്ലാം അവലോകനം ചെയ്തു മികച്ച പത്തു ബ്ലോഗുകളുടെ ഒരു പട്ടികയും , ചുരുക്കത്തില്‍ ഒരു നിരൂപണവും തയ്യാറാക്കുകയും ആണ് ഉണ്ടായത് .


ഫേസ് ബുക്കിന്റെയും മറ്റു സോഷിയല്‍ മീഡിയയുടെയും കടന്നാക്രമണത്തില്‍ ബ്ലോഗിന്റെ സാമൂഹ്യവും , സാംസ്കാരികവും ആയ പ്രസക്തി നഷ്ടപ്പെട്ടു എന്നുള്ള മുറവിളികള്‍ക്കിടയിലും മലയാള ബ്ലോഗില്‍ ആശാവഹം ആയ പരിവര്‍ത്തനങ്ങളും , ആവേശകരമായ കുത്തൊഴുക്കുകളും നടന്ന വര്ഷം കൂടിയാണ് കടന്നു പോകുന്നത് . മലയാളം സോഷിയല്‍ മീഡിയയില്‍ ഏറെ ഷെയര്‍ ചെയ്യപ്പെടുക്ലയും , ചര്‍ച്ച ചെയ്യപ്പെടുകയും ചെയ്ത വിഷയങ്ങള്‍ ബ്ലോഗിലൂടെ കടന്നുവന്നവ ആയിരുന്നു എന്നത് മലയാളം ബ്ലോഗിന്റെ പ്രഭക്കു മാറ്റ് കൂട്ടുന്നതുന്നതും , ബൂലോകത്തിന്റെ പ്രാധാന്യം വിളിച്ചു അറിയിക്കുന്നതും ആണ് . അതിനുപരിയായി അറിയപ്പെടുന്ന ചില പ്രിന്റ്‌ സാഹിത്യകാരന്മാരും / കാരികളും ബൂലോകത്തിനു നേരെ തൊടുത്ത വാഗ്ശരങ്ങളും , മുഖ്യധാരാ മാധ്യമങ്ങളില്‍ നിന്നും ലഭിച്ച കണക്കറ്റ പുച്ഛവും അതിജീവിച്ചു; ഒരു സമാന്തര മാധ്യമം എന്ന നിലയില്‍ ബൂലോകം ശ്രദ്ധിക്കപ്പെടാന്‍ തുടങ്ങിയതും പോകുന്ന വര്‍ഷത്തില്‍ ആണ് .


സാമൂഹ്യമായ ഒട്ടേറെ പ്രശ്നങ്ങളില്‍ ജനപക്ഷത്തു നിന്നുകൊണ്ട് അഭിപ്രായങ്ങളുടെ കേന്ദ്ര ബിന്ദു ആകുവാനും , മലയാളത്തിലെ മുഖ്യധാര മാധ്യമങ്ങള്‍ക്കും , സോഷിയല്‍ നെറ്റ്‌വര്‍ക്ക് സൈറ്റ്കള്‍ക്കും ഇടയില്‍ ഒരു സമാന്തര മാധ്യമം ആയി , നിന്നുകൊണ്ട് ഇരു വശത്തും ആയി നിലകൊള്ളുന്ന മേല്‍ പ്രസ്താവിച്ച മാധ്യമങ്ങള്‍ക്ക് മേല്‍ വളരെ അധികം സ്വാധീനം ചെലുത്താനും മലയാളം ബ്ലോഗിന് കഴിഞ്ഞിട്ടുണ്ട് എന്നത് നിസ്തര്‍ക്കം ആയ ഒരു പരമാര്‍ത്ഥം ആണ് .
മുല്ലപ്പെരിയാര്‍ പോലെ സാമൂഹ്യ പ്രാധാന്യം ഉള്ള വിഷയങ്ങള്‍ ആകട്ടെ , സന്തോഷ്‌ പണ്ഡിറ്റ്‌ പോലെ എന്റെര്‍ടയിന്മേന്റ്റ് മേഖലയില്‍ ഉള്ള വ്യക്തികള്‍ ആകട്ടെ , മലയാള ബ്ലോഗ്ഗര്‍ മാര്‍ കൈവെക്കാത്ത രംഗങ്ങള്‍ ഇല്ല എന്നു തന്നെ പറയാം . ആനുകാലിക രംഗങ്ങളില്‍ വൈവിധ്യവും പാണ്ഡിത്യവും തെളിച്ച ഒരു പിടി എഴുത്തുകാരുടെ തേരോട്ടത്തിന് പുറമേ , പ്രതിഭയുടെ മിന്നലാട്ടം തെളിയിച്ച സര്‍ഗധനന്മാരും നമ്മുടെ ബ്ലോഗ്‌ രംഗത്തെ കഴിഞ്ഞ വര്ഷം സമ്പുഷ്ടം ആക്കിയിട്ടുണ്ട് .

എന്നിരുന്നാലും മുന്‍പ് പറഞ്ഞതുപോലെ പ്രതിഭയുടെ ഈ മിന്നല്‍ ആട്ടങ്ങള്‍ക്ക് പുറമേ , മികച്ച സൃഷ്ടികളുടെ കാര്യത്തില്‍ സ്ഥിരത പുലര്‍ത്തിയവര്‍ തുലോം വിരളം ആയി മാത്രമേ കാണപ്പെട്ടുള്ളൂ എന്ന വസ്തുത നിരാശാജനകം ആണ് . മുന് വര്‍ഷങ്ങളിലേക്ക് നോക്കിയാല്‍ ഗുണനിലവാരത്തിന്റെ കാര്യത്തില്‍ സ്ഥിരത പുലര്‍ത്തിയ അനേകം പ്രതിഭാധനര് ഉണ്ടായിരുന്നു എന്നുള്ളതും , അവരില്‍ പലരും ഇന്ന് ഈ രംഗത്ത് ഇല്ലാ എന്നതും ചര്‍ച്ച ചെയ്യപ്പെടെന്ട വിഷയം തന്നെ .

വായനക്കാര്‍ തെരഞ്ഞെടുത്തു നല്‍കിയ ഇരുനൂറോളം ബ്ലോഗുകളില്‍ , കണ്ണിനു അല്പം എങ്കിലും ആനന്ദകരം ആയ കെട്ടും മട്ട്ടും ഉള്ളതും , മനസ്സിന് സന്തോഷം നല്‍കുന്ന രചനകള്‍ ഉള്ളതും ആയ എഴുപതോളം ബ്ലോഗുകള്‍ മാത്രമേ കണ്ടെത്താന്‍ ആയുള്ളൂ എന്നതും നിരാശാകരം ആയ അനുഭവം ആണ് . അനാകര്‍ഷകം ആയ ഫോണ്ടുകളെ ക്കൊണ്ടും , വായനക്കാരനും ആയി സൗഹൃദം പുലര്‍ത്താത്ത ചിട്ടപ്പെടുത്തല്‍ കൊണ്ടും ഒരു വികര്‍ഷണ സ്വഭാവം ഉളവാക്കുന്ന ബ്ലോഗുകളില്‍ രചനകള്‍ നല്ലത് എങ്കില്‍ പോലും സമയം ചെലവഴിക്കുക എന്നത് വേദനാജനകം ആയ അനുഭവം ആയി മാറുന്നു . അക്ഷരത്തെറ്റുകളുടെ കൂമ്പാരം ആയി മാറുന്ന ചില ബ്ലോഗ്ഗുകള്‍ , രചയിതാവിന്റെ പ്രതിഭയെ തമസ്കരിക്കുന്ന വിധം അസഹ്യം ആയും അനുഭവപ്പെട്ടു . ടൈപ്പിംഗ്‌ തെറ്റുകളും , പരിചയക്കുറവും, എഡിറ്റിംഗ് നടത്താനുള്ള സമയക്കുറവും ഒക്കെ ഒരു പരിധി വരെ ഇതിനു കാരണം ആയി അന്ഗീകരിക്കപ്പെടാം എങ്കിലും , ഇത് തിരുത്താന്‍ വിമുഖത കാണിക്കുന്ന ബ്ലോഗര്‍മാര്‍ ,നല്ല രചയിതാക്കളുടെ ഗണത്തില്‍ നിന്നും പിന്തള്ളപ്പെടും എന്ന വസ്തുതയും ചില ബ്ലോഗുകളില്‍ ഉണ്ടായ ഇത്തരം അനുഭവം കൊണ്ട് ചൂണ്ടി കാണിക്കപ്പെട്ടു .


മുന്‍പ് പറഞ്ഞ എഴുപതോളം ബ്ലോഗുകളില്‍ നല്ല ഒരുഭാഗവും രണ്ടായിരത്തി പതിനൊന്നിന്റെ ഉത്തരഭാഗത്തില്‍ പ്രവര്‍ത്തനനിരതം ആയിരുന്നില്ല എന്ന വസ്തുതയും പഠനാര്‍ഹം തന്നെ .
ഈ പരിമിതികള്‍ക്ക്‌ ഉള്ളില്‍ നിന്നുകൊണ്ട് അത്യുന്നത നിലവാരം പുലര്‍ത്തുന്ന നാല്പതോളം ബ്ലോഗുകള്‍ കണ്ടെത്താന്‍ ആയപ്പോള്‍ , അവയില്‍ നിന്നും മികച്ച പത്തെണ്ണം കണ്ടെത്തുക എന്ന ദൌത്യം ശ്രമകരം എങ്കിലും വളരെ ആസ്വാദ്യകരം ആയി അനുഭവപ്പെട്ടു . എന്നിരുന്നാലും അവസാന പട്ടികയില്‍ എങ്ങിനെ പത്തിന് പകരം പതിനൊന്നു എണ്ണം കടന്നു കൂടി എന്നു വിശദീകരിക്കാന്‍ വളരെ ശ്രമിച്ചാലും എനിക്ക് സാധിക്കും എന്നു തോന്നുന്നില്ല .


രണ്ടായിരത്തി പതിനൊന്നിലെ മികച്ച ബ്ലോഗുകളുടെ പട്ടികയില്‍ പത്താം സ്ഥാനത്തു നില്‍ക്കുന്ന, ഹൃദ്യം ആയ രചനകളുടെ സമാഹാരം ആണ് കുമാരന്‍ എന്ന ബ്ലോഗരുടെ കുമാര സംഭവങ്ങള്‍ എന്ന ബ്ലോഗ്‌ .പ്രേസേന്റെഷനില്‍ ഒതുക്കവും , ഗ്രാമീണമായ ഒരു മാധുര്യവും തുളുമ്പി നില്‍ക്കുന്ന ഈ ബ്ലോഗ്‌ ,അതിന്റെ മുകളില്‍ കോറിയിട്ട രചയിതാവിന്റെ ചിത്രം പോലെ തന്നെ ലാളിത്യം മുഖ മുദ്രയാക്കിയിരിക്കുന്നു . നര്‍മ്മത്തില്‍ ചാലിച്ച് ലളിത മധുരമായ ഗ്രാമീണ കഥകള്‍ നമ്മുടെ മുന്‍പില്‍ എത്തിച്ചിരുന്ന കഥാകാരന്‍ , കാല്പനികതയിലെക്കും ആനുകാലിക സമൂഹത്തിന്റെ പൊള്ളത്തരങ്ങളിലെക്കും കൂടുതല്‍ ശ്രദ്ധ പതിപ്പിച്ചുകൊണ്ട് സമീപ കാലത്ത് നടത്തിയ ചുവടുമാറ്റം അത്ര വിജയപ്രദം ആയി എന്നു തോന്നുന്നില്ല . കയ്യടി കൂടുതലായി വാങ്ങുക എന്ന ലക്ഷ്യത്തോടെ ആയിരിക്കണം മുന്‍കാല പോസ്റ്റുകളില്‍ കരുതലോടെ ഒളിപ്പിച്ചു വച്ച ലൈന്‍ഗികത സമീപകാല രചനകളില്‍ കൂടുതല്‍ ആയി മറനീക്കി പുറത്തുവരുന്നുണ്ട് . എന്നൊക്കെയോ നമുക്ക് അന്യം ആയ ആ ഗ്രാമങ്ങളുടെ ലാളിത്യം പൂര്‍ണമായും ഉള്‍ക്കൊണ്ടിരുന്ന ബ്ലോഗ്ഗറുടെ പഴയകാല രചനയുടെ ഘടനക്കും , ടെക്നികിനും പലപ്പോഴും ഈ മാറ്റങ്ങള്‍ ഉള്‍ക്കൊള്ളാന്‍ പറ്റിയിട്ടില്ല എന്നു സമീപകാല രചനകള്‍ സൂചിപ്പിക്കുന്നു .


പോയവര്‍ഷത്തെ മികച്ച രചന : ആദ്യരാത്രി ശിവരാത്രി
ഒന്‍പതാം സ്ഥാനത്തു രണ്ടു ബ്ലോഗുകള്‍ പരിഗണിച്ചിട്ടുണ്ട് .
നജീം കൊച്ചുകലുങ്ക് എന്ന ബ്ലോഗ്ഗറുടെ സ്ലേറ്റ്‌ എന്ന ബ്ലോഗ്‌ അതിലെ പരിസ്ഥിതി സംബന്ധം ആയ ലേഖനങ്ങള്‍ ഒന്നുകൊണ്ടു മാത്രം വേറിട്ട്ടു നില്‍ക്കുന്നതും ഉന്നത നിലവാരം പുലര്‍ത്തുന്നതും ആണ് . മനം മയക്കുന്ന ചിത്രങ്ങളും , അതിനോട് അനുബന്ധിച്ചുള്ള മനോഹരമായ വര്‍ണനകളും കാടിന്റെ വന്യസൌന്ദര്യം നമ്മുടെ സ്വീകരണ മുറിയിലേക്ക് എത്തിക്കുമ്പോള്‍ ,കാടുകളില്‍ ജീവിക്കുന്ന ആദിവാസികളുടെ പരിസ്ഥിതിയുമായി ബന്ധപ്പെട്ട വിശ്വാസങ്ങളെക്കുറിച്ചുള്ള പരാമര്‍ശങ്ങളും ചിന്തോദീപകങ്ങള്‍ ആണ് . ഈ ബ്ലോഗില്‍ കഥ കവിത തുടങ്ങിയ അനേകം വിഭവങ്ങള്‍ ഉണ്ടെങ്കിലും അവ പരിസ്ഥിതി സംബന്ധം ആയി ഉള്ള ലേഖനങ്ങള്‍ക്കുള്ള നിലവാരം പുലര്‍ത്തുന്നതായി കാണുന്നില്ല .

പോയവര്‍ഷത്തെ മികച്ച രചന: അപൂര്‍വതകളുടെ അരിപ്പ
ബൂലോകം ഓണ്‍ലൈനില്‍ ആരംഭിച്ചിട്ടുള്ള മനോജ്‌ രാജഗോപാലിന്റെ അമ്മാവന്റെ ചായക്കട എന്ന പംക്തി ഇന്നൊവേഷന്‍ കൊണ്ടും , ആഖ്യാനശൈലി കൊണ്ടും ശ്രദ്ധ പിടിച്ചു പറ്റുന്നത് ആണ് . പാചക സാഹിത്യം എന്ന സാഹിത്യ ശാഖയുടെ ഉപജ്ഞാതാവ് എന്ന രീതിയില്‍ ബ്ലോഗ്ഗര്‍ അഭിനന്ദനം അര്‍ഹിക്കുന്നു എങ്കിലും ,സംഭാഷണത്തില്‍ ഒഴിച്ചുകൂടാത്തതും , ആഖ്യാനത്തില്‍ അനാവശ്യവും ആയ ഗ്രാമീണ ഭാഷയുടെ ഉപയോഗത്തില്‍ ഉള്ള നിയന്ത്രണവും , ടൈപ്പിംഗ് തെറ്റുകളുടെ നിയന്ത്രണവും ഈ പംക്തിയെ കൂടുതല്‍ ആകര്‍ഷകവും ജനപ്രിയവും ആക്കും എന്നതില്‍ സംശയിക്കാന്‍ ഇല്ല . ഗ്രാമീണ അന്തരീക്ഷത്തില്‍ ഉള്ള ചായക്കടയില്‍ , വടക്കെ ഇന്ത്യന്‍ , ചൈനീസ് , യൂറോപ്പിയന്‍ വിഭവങ്ങള്‍ ഒക്കെ പാചകം ചെയ്യാന്‍ പറ്റുമോ എന്ന കാര്യം കാത്തിരുന്നു കാണേണ്ടിയിരിക്കുന്നു . എന്നിരുന്നാലും ഇത്തരം ഒരു അമ്മാവനും അമ്മായിയും മലയാളിയുടെ ഗ്രാമീണ ജീവിതത്തിന്റെ അവിഭാജ്യ ഘടകങ്ങള്‍ ആയതിനാല്‍ അവിടെയുണ്ടാക്കുന്ന എല്ലാ വിഭവങ്ങളും എനിക്ക് പ്രിയപ്പെട്ടത് തന്നെ .

പോയവര്‍ഷത്തെ മികച്ച രചന: നല്ല തുടുത്ത തൊടയാണല്ലോ അച്ചാമ്മേ
എട്ടാം സ്ഥാനത്തു, കവിത വിരിയിക്കുന്ന ഒരുപിടി കഥകളുമായി നില്‍ക്കുന്നു ഷാജഹാന്‍ നന്മണ്ടന്‍. വിരഹവും വേദനയും ഇടകലര്‍ന്ന പ്രവാസ നൊമ്പരങ്ങളും , കത്തിജ്വലിക്കുന്ന മരുഭൂമിയിലെ ചൂടും; പൊള്ളുന്ന സത്യങ്ങള്‍ ആയി നില്‍ക്കുമ്പോഴും അത്തറിന്റെ പരിമളം ഉള്ള ഒരു അറേബ്യന്‍ കാറ്റുപോലെ ,മാതള മരങ്ങളില്‍ മരുകാറ്റ് പെയ്യിക്കുന്ന സംഗീതം പോലെ നമ്മെ സാന്ത്വനിപ്പിക്കുന്ന എന്തോ ഒരു അനുഭൂതി ഈ കഥകള്‍ നമുക്ക് പകര്‍ന്നു തരുന്നു . വികാരങ്ങളുടെ ഭാവനാ ലോകത്തുനിന്നും വിചാരങ്ങളുടെ യാഥാര്ത്യത്തിലേക്ക് തിരികെ എത്തുന്ന സന്ദര്‍ഭങ്ങളില്‍ കഥാ തന്തുവിനു ഒരു ചെറിയ ഉലച്ചില്‍ അനുഭവപ്പെടുന്നു എന്ന ഒരു ന്യൂനത ഒഴിവാക്കിയാല്‍ ,എണ്ണപ്പെട്ട ചെറുകഥകളുടെ ഗണത്തില്‍ പെടുത്താവുന്നതാണ് ഇദ്ദേഹത്തിന്റെ പലകഥകളും. ബൂലോകം ഓണ്‍ ലയിനിറെ ,ആധുനിക സാങ്കേതിക വിദ്യയുടെ പിന്‍ബലം ഉപയോഗപ്പെടുതുന്നതും , മനോഹരമായ ചിത്രങ്ങളിലൂടെ വായനക്കാരുമായി കൂടുതല്‍ അടുത്ത് സംവേദനം ചെയ്യുന്നതും അദ്ധേഹത്തിന്റെ കഥകള്‍ക്ക് കൂടുതല്‍ മിഴിവേകാന്‍ ഉപകരിക്കുന്നു .

പോയവര്‍ഷത്തെ മികച്ച രചന: അബൂബദര്‍ പറയാന്‍ ബാക്കി വെച്ചത്
ഏഴാം സ്ഥാനത്തു ഈ വര്ഷം തൊണ്ണൂറ്റി രണ്ടു പോസ്റ്റുകളും ആയി വള്ളിക്കുന്ന് ഡോട്ട് കോമിലൂടെ കഴിഞ്ഞ വര്‍ഷത്തെ സൂപ്പെര്‍ ബ്ലോഗ്ഗര്‍ അവാര്‍ഡ് ജേതാവായ ബഷീര്‍ വള്ളിക്കുന്ന് നിലകൊള്ളുന്നു . ജനപ്രിയന്‍ ആയ ഈ ആനുകാലിക ബ്ലോഗ്ഗര്‍ ഒരു കൂട്ടം നല്ല പോസ്റ്റുകളും ആയി ഈ വര്ഷം ജനകീയ പ്രശ്നങ്ങളില്‍ സജീവമായി ഇടപെടാന്‍ ശ്രമിച്ചിട്ടുണ്ടെങ്കിലും , ചില വിശ്വാസപ്രമാണങ്ങളുടെയും , വ്യക്തിസ്നേഹങ്ങളുടെയും ചങ്ങല്‍ക്കെട്ടിനുള്ളില്‍ നിന്നുകൊണ്ട് എഴുതി, എന്നു തോന്നിപ്പിക്കുന്ന വളരെയധികം പോസ്റ്റുകള്‍ക്കും ഇദ്ദേഹം ജന്മം നല്‍കിയിട്ടുണ്ട് . നര്‍മത്തില്‍ നിന്നും , ഗൌരവത്തിലേക്കും തിരിച്ചും കൈകാര്യം ചെയ്യുന്ന വിഷയത്തിനു അനുസരിച്ച് ഭാഷാന്തരം ചെയ്യാന്‍ കഴിവുള്ള ഈ ബ്ലോഗ്ഗര്‍ മേല്‍പ്പറഞ്ഞ ചങ്ങലക്കെട്ടുകള്‍ പൊട്ടിച്ചു പുറത്തുവന്നാല്‍ ഇപ്പോള്‍ പിന്തുണ നല്‍കുന്ന കൂറുള്ള ഒരു വലിയ സംഘത്തിനു പുറമേ , ഒരു വന്‍ ആസ്വാദക വലയത്തിന് ഉടമയാകാന്‍ അദ്ദേഹത്തിന് കഴിഞ്ഞേക്കും .

പോയവര്‍ഷത്തെ മികച്ച രചന: ദാസേട്ടാ രഞ്ജിനി വിളിക്കുന്നു
സമൂഹത്തെ വേട്ടയാടുന്നതും കാര്‍ന്നു തിന്നുന്നതും ആയ അഴിമതി പോലെയുള്ള വിഷയങ്ങളില്‍ അവഗാഹം ആയ പഠനത്തിന്റെ പിന്‍ബലത്തോടെ രചിക്കപ്പെട്ട ആധികാരികമായ ലേഖനങ്ങളുടെ അന്ഗീകരിക്കപ്പെടെണ്ട ഒരു സമാഹാരം ആണ് ആറാം സ്ഥാനത്തുള്ള ആല്‍കെമിസ്റ്റ് എന്ന ബ്ലോഗ്ഗറുടെ കാലിടോസ്കൊപ് ഒരു ടീ ടൈം ബ്ലോഗ്‌ .നീതിനിഷേധിക്കപ്പെട്ട മദനിയും , നീതിന്യായത്തിന്റെ കഴുത്തറക്കുന്ന ചിദംബരവും എന്നിങ്ങനെ സാധാരണ മാധ്യമങ്ങള്‍ തൊടാന്‍ മടിക്കുന്ന വിഷയങ്ങള്‍ ഒരു ഗവേഷകന്റെ ചാരുതയോടും ഔത്സുക്യതോടും അവതരിപ്പിക്കുന്ന ഈ ബ്ലോഗ്ഗര്‍ നിര്‍ഭയം ആയ പ്രതികരണശേഷിയും , നിസ്തുലമായ രചനാപാടവവും പ്രദര്‍ശിപ്പിക്കുന്നു . ഈ ടീ ടൈം ബ്ലോഗ്‌ സാധാരണ മലയാളി ബ്ലോഗ്‌ വായനക്കാരന് ഉള്ള ‘ കപ്പ്‌ ഓഫ് ടീ ‘ വിളമ്പുന്നില്ല എന്ന കാരണത്താല്‍ ആയിരിക്കും പോപ്പുലാരിറ്റിയില് ഇത് വളരെ ഒന്നും മുന്നില്‍ അല്ല . ഗിമ്മിക്കുകളിലൂടെ ജനസമ്മതി കൂട്ടുവാന്‍ ഈ രചയിതാവിന് ഉദ്ദേശം ഇല്ല എന്നു ഉളവാകുന്ന തോന്നലും , ഗൌരവതരങ്ങള് ആയ വിഷയങ്ങള്‍, അര്‍ഹിക്കുന്ന പ്രാധാന്യത്തോടെ കൈകാര്യം ചെയ്യുവാന്‍ തക്ക പാണ്ഡിത്യവും ആശയസമ്പന്നതയും രചയിതാവിന് ഉണ്ട് എന്ന നിരീക്ഷണവും ബ്ലോഗിനെ ഗൌരവം ആയി കാണുന്ന ഒരു വിഭാഗം മലയാളികള്‍ക്ക് ഈ സംരഭത്തെ, തുടര്‍ന്നും വളര്‍ത്തുവാന്‍ ‍ പ്രചോദനം നല്‍കും എന്നു പ്രതീക്ഷിക്കുന്നു .

പോയവര്‍ഷത്തെ മികച്ച രചന:ചിദംബരസ്മരണ
നല്ല ബ്ലോഗുകളില്‍ അഞ്ചാം സ്ഥാനത്തു ഉള്ളത് അരുണ്‍ കായംകുളം എന്ന ബ്ലോഗ്ഗറുടെകായം കുളം സൂപ്പെര്‍ ഫാസ്റ്റ് എന്ന ബ്ലോഗാണ് . പുതിയ രചയിതാക്കളില്‍ അത്യപൂര്‍വ്വം ആയി കാണപ്പെടുന്ന ഭാഷാ ശുദ്ധിയും ; ഒഴുക്കും ഒതുക്കവും ഉള്ള രചനാശൈലിയും സമാനുപാതത്തില്‍ ചാലിച്ച മഷിയില്‍ രചിച്ച; ‍ കായംകുളം സൂപ്പെര്‍ ഫാസ്റ്റ് ,പ്രായഭേദം ഇല്ലാതെ എല്ലാവരെയും ആകര്‍ഷിക്കുന്ന ഒരു ഇന്‍സ്റ്റന്റ് ഹിറ്റ്‌ ആണ് . യുവ ദമ്പതികളുടെ അജ്ഞതയില്‍ നിന്നും ഉടലെടുക്കുന്ന നര്‍മ്മം മുതല്‍ , കുട്ടിക്കാലത്തെ നിഷ്കളങ്കമായ പള്ളിക്കൂടം ഫലിതങ്ങള്‍ വരെ തന്മയത്വത്തോടെ അവതരിപ്പിക്കുന്ന ഈ ബ്ലോഗില്‍ ഭാഷയുടെ ചടുലതയും നര്‍മ്മത്തിന് വേണ്ടി ട്വിസ്റ്റ്‌ ചെയ്യപ്പെടുന്ന ഭാഷയും ആകര്‍ഷണീയത നല്‍കുന്ന ഘടകങ്ങള്‍ ആണെങ്കിലും , ചിലപ്പോള്‍ എങ്കിലും ആഖ്യാന ശൈലി അല്പം മോണോടോണസ് ആകുന്നുണ്ടോ എന്നു സംശയിക്കേണ്ടിയിരിക്കുന്നു . എന്നിരുന്നാലും പാരകള്‍ ആയി മാറുന്ന കാരണവര്‍ വൃന്ദവും , പഠനത്തിന്റെ പ്രാധ്യാന്യം എന്തിലും ഉപരിയായി കാണുന്ന അധ്യാപികയായ മാതാവും മറ്റും നര്‍മത്തിലൂടെ മുന്നില്‍ വരുമ്പോള്‍ നമ്മില്‍ പലര്‍ക്കും അത് സ്വന്തം ജീവിതത്തിലേക്ക് ഉള്ള രസാവഹം ആയ ഒരു തിരിഞ്ഞുനോട്ടം ആയും അനുഭവപ്പെട്ടെക്കാം.

പോയവര്‍ഷത്തെ മികച്ച രചന: മോഹന്‍ ജെദാരോ കോളനി
നാലാം സ്ഥാനത്തു നാനൂറ്റി അന്‍പതോളം പോസ്റ്റുകളും ആയി നിറഞ്ഞു നില്‍ക്കുന്നത് ബെര്‍ളിതരങ്ങള്‍ ഡോട്ട് കോമിലൂടെ മലയാളത്തിലെ ഏറ്റവും ജനപ്രിയ ബ്ലോഗ്ഗര്‍ ആയ ബെര്‍ളി തോമസ്‌ ആണ് . പൈങ്കിളി എന്നൊക്കെ വിളിച്ചു ആക്ഷേപിക്കാന്‍ പലര്‍ക്കും പല വകകളും ഈ ബ്ലോഗില്‍ കണ്ടുപിടിക്കാന്‍ ഉണ്ടെങ്കിലും ജനത്തിന് വേണ്ട എല്ലാ ചേരുവകളും ഉള്ള തനതായ ഒരു ഫോര്‍മുലയുടെ ഉപജ്ഞാതാവും ഉടമയും ആണ് ബെര്‍ലി തോമസ്‌ എന്ന സത്യം അന്ഗീകരിക്കേണ്ടത് ഉണ്ട് .

കാലാകാലമായി പുലര്‍ത്തിക്കൊണ്ടിരുന്ന രാഷ്ട്രീയ വീക്ഷണവും , വലതുപക്ഷരാഷ്ട്രീയ വ്യക്തി പൂജകളും വലിച്ചെറിഞ്ഞു ജനപക്ഷത്ത് നിന്നുകൊണ്ട് ബെര്‍ളി തോമസ്‌ അടുത്ത കാലത്ത് ജനകീയപ്രശ്നങ്ങളില്‍ നടത്തിയ പോരാട്ടങ്ങള്‍ അനുപമം എന്നു മാത്രമേ വിശേഷിപ്പിക്കാനാവൂ . സാധാരണക്കാരന് എളുപ്പം ആസ്വദിക്കാന്‍ കഴിയുന്ന ലളിതമായ ശൈലിയും , വേണ്ട സമയത്ത് ഉപയോഗിക്കുന്ന സൂപ്പെര്‍ഹിറ്റ് സിനിമാ ഡയലോഗുകള്‍ക്ക് സമാനമായ പദപ്രയോഗങ്ങളും , അല്പം അശ്ലീല ചുവയുള്ള പ്രയോഗങ്ങളും ബെര്‍ളിക്ക് ബോക്സ്‌ ഓഫീസ് വിജയം നേടിക്കൊടുക്കുന്ന ഘടകങ്ങള്‍ ആണെങ്കിലും , പഴയ പോസ്റ്റുകളില്‍ നിറഞ്ഞു നിന്നിരുന്ന കുസൃതി ഈയിടെയായി പൂര്‍ണമായും അപ്രത്യക്ഷം ആയി എന്നു നിരീക്ഷിക്കുന്നു .

അടുത്ത കാലത്തായി ഈ ബ്ലോഗിന്റെ പ്രധാനം ആയ ആകര്‍ഷണം, കമ്മന്റ് ബോക്സില്‍ നിറഞ്ഞു നില്‍ക്കുന്ന ഒരുപറ്റം കുസൃതിക്കാരുടെ സാന്നിധ്യം ആല്ലേ എന്നും ചിലര്‍ ബൂലോകത്ത് സംശയം പ്രകടിപ്പിച്ചു തുടങ്ങിയിട്ടുണ്ട് . ബ്ലോഗിന്റെ ഗുമ്മു കൂട്ടുവാന്‍ വേണ്ട കുസൃതികള്‍ ഒപ്പിക്കുവാന്‍ ബെര്‍ലിയെപ്പോലെ അറിവുള്ളവര്‍ ബൂലോകത്ത് വിരളം ആണെന്ന് ഇരിക്കെ തന്റെ ഫോര്‍മുലയില്‍ അല്പം മാറ്റം വരുത്തി കൂടുതല്‍ ഗുമ്മും ആയി പുതുവര്‍ഷത്തില്‍ എത്താന്‍ ബെര്‍ലിതരങ്ങള്‍ക്ക് കഴിയും എന്നു പ്രതീക്ഷിക്കുന്നു .

പോയവര്‍ഷത്തെ മികച്ച രചന:കുമാരസംഭവം
ഒരിടക്ക് അന്യം നിന്നുപോയി എന്നു കരുതപ്പെട്ടിരുന്ന മലയാള യാത്രാ വിവരണ രംഗത്തെ സമ്പുഷ്ടം ആക്കികൊണ്ട് നമ്മുടെ ലോകത്തെ, മലയാളിക്ക് പരിചയപ്പെടുത്താന്‍ പലവിധ മായ ദൃശ്യ -ശ്രവ്യ മാധ്യമങ്ങളിലൂടെയും ശ്രമങ്ങള്‍ നടക്കുന്നുണ്ടെങ്കിലും , ബൂലോകത്ത് ഇത്തരത്തില്‍ ശ്ലാഘനീയം ആയ പ്രവര്‍ത്തനം കാഴ്ചവെച്ച നിരക്ഷരന്‍ എന്ന ബ്ലോഗ്ഗറുടെ ചില യാത്രകള്‍ എന്ന ബ്ലോഗ്‌  നല്ല ബ്ലോഗുകളുടെ പട്ടികയില്‍ മൂന്നാം സ്ഥാനത്തു പ്രതിഷ്ടിക്കപ്പെട്ടിരിക്കുന്നു . മനോഹരം ആയ ചിത്രങ്ങളും , തീമുകളെ അടിസ്ഥാനം ആക്കിയുള്ള സ്ഥല വര്‍ണനകളും ഈ ബ്ലോഗിന്റെ സവിശേഷതകള്‍ ആയി കരുതാം . എത്തിപ്പെടുന്ന സ്ഥലത്തെ സംസ്കാരങ്ങളെ കുറിച്ച് ആഴത്തില്‍ മനസ്സിലാക്കുവാനുള്ള രചയിതാവിന്റെ ത്വര വായനക്കാരനെയും ആഴത്തില്‍ സ്വാധീനിക്കും എങ്കിലും , പൊറ്റക്കാടിന്റെയും മറ്റും കൃതികളില്‍ ലഭിച്ചിരുന്ന കാവ്യാനുഭൂതി ഈ രചനകളില്‍ നിന്നും പലപ്പോഴും ലഭിക്കുന്നില്ല .

ഇരുത്തം വന്ന സഞ്ചാരിയുടെ പക്വതയാര്‍ന്ന സമീപനങ്ങള്‍ ലേഖനങ്ങളില്‍ ഉടനീളം ദൃശ്യം ആകുന്നതും , വാക്ക്കൊണ്ട് രചിച്ച മനോഹര ചിത്രങ്ങള്‍ യാഥാര്‍ത്യവും ആയി എത്ര അടുത്ത് നില്‍ക്കുന്നു എന്നു അനുഭവിച്ചു അറിയുന്നതും ഈ ബ്ലോഗിന്റെ സമകാലീന പ്രാധാന്യം വിളിച്ചോതുന്നു . യാത്രക്കിടയിലെ ചെറിയ ചെറിയ സംഭവങ്ങള്‍ വികസിപ്പിച്ചെടുത്തു , അതിലൂടെ ഒരുപ്രദേശ ത്തെയും അതിന്റെ സംസ്കാരത്തെയും പരിചയപ്പെടുത്താന്‍ കൂടുതല്‍ ആയി ശ്രമിച്ചാല്‍ ഈ യാത്രാവിവരണങ്ങള്‍ ഉദാത്തം ആയ ഒരു തലത്തിലേക്ക് ഉയരും എന്നു സംശയം എന്യേ പറയാന്‍ കഴിയും .

പോയവര്‍ഷത്തെ മികച്ച രചന; കൊളംബോ കാഴ്ചകള്‍
ബ്ലോഗിന് സാമൂഹ്യ പ്രശ്നങ്ങളില്‍ എത്രമാത്രം സ്വാധീനം ചെലുത്താന്‍ കഴിയും എന്നും , ആക്ഷേപ ഹാസ്യത്തിന്റെ ചാട്ടുളികള്‍ ‍ കാര്‍ട്ടൂണ്‌കളിലൂടെ സമൂഹത്തിന്റെ വൈകൃതങ്ങളില്‍ എങ്ങനെ തുളച്ചു കയറും എന്നും ഉള്ളതിന് പ്രകടം ആയ ഉദാഹരണം ആയി മാറിയ നൌഷാദ് അകമ്പാടം എന്ന ബ്ലോഗരുടെ എന്റെ വര എന്ന ബ്ലോഗ്‌ , ഉള്ളടക്കത്തിന്റെ ഗുണമേന്മ കൊണ്ടും , സാമൂഹ്യ പ്രസക്തി കൊണ്ടും സമകാലീന ബൂലോകത്തിന്റെ ഉന്നതങ്ങളില്‍ എത്തുന്നതിനാല്‍ എന്റെ പട്ടികയില്‍ രണ്ടാം സ്ഥാനം അലങ്കരിക്കുന്നു . ഗോള്‍ഡ്‌ സ്റ്റാന്‍ഡര്‍ഡു എന്നു കരുതി മലയാളികള്‍ കരുതി ബഹുമാനിക്കുന്ന പ്രിന്റു മുത്തശികള്‍ പോലും മോഷ്ടിച്ച് എടുക്കുന്ന സൃഷ്ടികള്‍ ഗുണ നിലവാരത്തിന്റെ കാര്യത്തില്‍ എത്ര മുന്നിട്ടു നില്‍ക്കുന്നു എന്നതിന് വേറെ തെളിവുകള്‍ ഒന്നും ആവശ്യം ഉണ്ട് എന്നു തോന്നുന്നില്ല .

മുല്ലപ്പെരിയാര്‍ പ്രശ്നം ‍ കത്തിയെരിഞ്ഞ്‌ നില്‍ക്കുന്ന ഈ അവസരത്തില്‍ ഫേസ്‌ബുക്കിലൂടെയും മറ്റും ഏറ്റവും ഷെയര്‍ ചെയ്യപ്പെട്ട നൌഷാദിന്റെ മുല്ലപെരിയാര്‍ പോസ്റ്റുകള്‍ , അഭിപ്രായ രൂപീകരണത്തില്‍ മലയാളികളെ എത്രമാത്രം സ്വാധീനിച്ചിട്ടുണ്ട് എന്നത് ബൂലോകത്തെ കൊച്ചു കുട്ടികള്‍ക്കുപോലും അറിവുള്ള കാര്യം ആണല്ലോ . കളിയും കാര്യവും കെട്ടുപിണഞ്ഞു കിടക്കുന്ന ഈ ബ്ലോഗു വരകള്‍ക്ക് ഈ വര്‍ഷത്തെ നല്ല ബ്ലോഗുകളുടെ നിരയില്‍ രണ്ടാം സ്ഥാനം കൊടുക്കാന്‍ രണ്ടാമത് ഒന്ന് ആലോചിക്കേണ്ട കാര്യം ഇല്ല .

പോയവര്‍ഷത്തെ മികച്ച രചന: അണക്കെട്ട് പൊട്ടിയാല്‍
രണ്ടായിരത്തി പതിനൊന്നില്‍ ബൂലോകത്തിനു ഉണ്ടായ വരദാനം എന്നു ഞാന്‍ വിശേഷിപ്പിക്കുവാന്‍ ആഗ്രഹിക്കുന്ന എന്റെ പ്രിയപ്പെട്ട ബ്ലോഗ്‌ ഏത് എന്നു ചോദിച്ചാല്‍ ഒരു ഉത്തരമേ പറയാനുള്ളൂ . കണ്ണൂരാന്‍ എന്ന ബ്ലോഗ്ഗറുടെ കല്ലിവല്ലി എന്ന ബ്ലോഗ്‌ .ബൂലോകത്ത് എവിടെയോ തടവില്‍ കിടന്നിരുന്ന വാഗ്ദേവതയെ മോചിപ്പിച്ചു ഈ ബ്ലോഗിലേക്ക് ആവാഹിച്ച ഒരു മാന്ത്രികനോ ഇതിന്റെ രചയിതാവ് എന്നു അത്ഭുതം തോന്നുമാറുള്ള ഒരു അനുഭവം ആയിരുന്നു കല്ലിവെല്ലിയില് നിന്നും ലഭിച്ചത് . കണ്ണൂരാന്റെ ആമുഖത്തില്‍ സൂചിപ്പിക്കുന്നത് ഇങ്ങനെയാണ് ‍ ‘പലതും ഇങ്ങനെ കാണേണ്ടി വന്നതിനാല്‍ ജീവിതത്തിന്‍റെ ഉള്ളുപൊള്ളി എന്നതാണ് സത്യം! വള്ളിപുള്ളി തെറ്റാതെ ചിലത് ഞാനിവിടെ കുറിക്കുന്നു’ .

ഈ വളളി പുള്ളി വിടാതെയുള്ള കുറിപ്പില്‍ നിറയുന്ന ഉള്ളുപൊട്ടി ഒഴുകുന്ന ഭാവന , അന്യാദൃശ്യമായ ശൈലി, ധാര്‍ഷ്ട്യത്തിനു ഒപ്പമെത്തും വിധം ഉള്ള ആത്മവിശ്വാസം ഇവയൊക്കെയാണ് പ്രഥമ ദൃഷ്ടിയാ കാണാന്‍ കഴിയുന്നത്‌ എങ്കിലും മാന്ത്രികതയെ തൊട്ടുരുമ്മി നില്‍ക്കുന്ന റിയലിസം , ജീവിതത്തിന്റെ തീച്ചൂളയില്‍ ആറ്റി കുറുക്കി എടുത്ത നര്‍മ്മം ഇവയൊക്കെ മറ്റൊരിടത്തും കാണാന്‍ കഴിയാത്ത കഥയുടെ ടെക്നിക്കുകള്‍ ആണെന്നിരിക്കെ ഈ ബ്ലോഗ്‌ പകര്‍ന്നു തരുന്ന ആസ്വാദനത്തിന്റെ മധുവും , ഒന്ന് വേറെ തന്നെ . തന്റെ ജീവിത പുസ്തകത്തില്‍ നിന്നും ചീന്തിയെടുത്ത ഒരു കടലാസ് എന്ന മട്ടില്‍ കഥാകാരന്‍ പറയുന്ന ഓരോ കൊച്ചു സംഭവങ്ങളുംഅനുവാചകന്റെ മനസ്സില്‍ തേന്‍ തുള്ളിയായോ , ഒരു ഗസലിന്റെ ഈണമായോ പെയ്തിറങ്ങുമ്പോള്‍ ഈ വര്‍ഷത്തെ ലക്ഷക്കണക്കിന്‌ മലയാളം ബ്ലോഗുകള്‍ക്ക്‌ മുകളിലായി , ബൂലോകത്തിന്റെ ഉച്ചിയില്‍ കല്ലിവല്ലിയെ ഞാന്‍ പ്രതിഷ്ട്ടിക്കുന്നു.

.പോയവര്‍ഷത്തെ മികച്ച രചന: അങ്ങനെ ഞാനൊരു പണ്ടാരിയായി .
അവസാന പട്ടികയില്‍ ഒരു സബ്ജെക്റ്റിവിറ്റി ; അല്ലങ്കില്‍ തിരഞ്ഞെടുത്ത ആളുടെ വീക്ഷണത്തിന്റെ സ്വാധീനം ഉണ്ടായിരിക്കാം എന്നു ചിന്തിച്ചാല്‍ തന്നെ , സ്ഥാനക്രമ നിര്‍ണ്ണയത്തില്‍ എന്നെ സ്വാധീനിച്ച ഘടകങ്ങള്‍ കൂടി വായനക്കാരായ നിങ്ങളുടെ വിധി നിര്‍ണ്ണയത്തിനു മുന്പായി പരിഗണിക്കണം എന്ന അഭ്യര്‍ത്ഥനയോടെ ഈ പുതുവത്സരത്തില്‍; പോയവര്‍ഷം ബൂലോകത്തിനു ലഭിച്ച ശ്രദ്ധയും ,പ്രാധാന്യവും അധികം ആയി ലഭിക്കട്ടെ എന്നും , നല്ല ‘ ഗുമ്മു ‘ കൊണ്ട് സമൃദ്ധം ആയ അനേകം പോസ്റ്റുകള്‍ നമുക്ക് ലഭിക്കട്ടെ എന്നും , കഴിവുള്ള പുതിയ എഴുത്തുകാരാല്‍ ബൂലോകം നിറയട്ടെ എന്നും ആശംസിക്കുന്നു . ‍

Popular posts from this blog

തെങ്ങിൻ തൈ നടാൻ കാലമായി; 50 വർഷത്തെ മുന്നിൽ കണ്ട്‌...

സ്ത്രീസ്വത്വാന്വേഷണം മലയാളസാഹിത്യത്തിൽ

ജൈവവളം മാത്രം പോരേ?