സൈനുദ്ദീന്‍ ഖുറൈഷി
പറയാന്‍ മറന്നതേറെയുണ്ട്
ഓര്‍ത്തെടുക്കാനാവാത്ത,തതിലേറെ
ഓര്‍മ്മയിലുള്ളവ കാര്‍ന്നെടുക്കുന്നത്
ഒരിക്കലുമൊരിക്കലും
മറക്കാനരുതാത്തതും.
അളന്നളന്ന് ചുരുങ്ങിപ്പോയ
ആറടി മണ്ണിനും കരം..!!
ജീവിതം പണയപ്പെട്ടതിന്‍ കടം
കനം വെപ്പിച്ച ജഡമെടുക്കാന്‍
മുനിസിപ്പാലിറ്റിക്കും
കൈക്കൂലി.!!
അപകടപ്പെട്ടിരുന്നെങ്കിലൊരു-
പിരിവിന് തരമെന്ന സാമൂഹ്യപാഠം.
നെഞ്ചത്തടിക്കാതെ കാറുന്നവള്‍
നിരാശപ്പെടുന്നതെടുക്കാതെ
പോയൊരു
“ജീവന്‍
സുരക്ഷയുടെ” മൂല്യമോര്‍ത്ത്.
ലോകമിങ്ങനെയോ.. ലോകരിങ്ങനേയോ..?
മരിച്ചാലൊരു തവണ പിന്നെയും
ജനിക്കണ-
മെങ്കിലേ ജീവിതം ജീവിക്കാനാകൂ.
നായായും എലിയായും കിളിയായുമല്ല;
നെറികേടിന്‍ നിസ്തുലരൂപമാം
മനുഷ്യനായി.
