ഉല്ട്ട പുല്ട്ട

ഡോ.കെ.ജി.ബാലകൃഷ്ണൻ 

=================

1.

എതിർ ദിശയിൽ 

ഫാൻ;

സ്പീഡില്ല;

കാറ്റുമില്ല.

മെക്കാനിക്ക് വന്നു.

കണ്ടു കേട്ടു മണത്തു 

തൊട്ടു സ്വദിച്ചു;

ഉരിയാടി:

"ഉല്ട്ട. "

അങ്ങനെ ഒരു കഹാനി.

വളരെ കൊതിച്ച് 

ഓരോ കാലണയും കുട്ടിവച്ച്

വാങ്ങിയ പങ്ക;

യന്ത്രം-

എന്തോ-

എല്ലാം ഉല്ട്ട.

കാര്യങ്ങൾ 

ഉല്ട്ട പുല്ട്ട.

2

എന്റെ 

കണ്ണ് കാത് 

നാക്ക് മൂക്ക് 

ത്വക്ക് 

ഒക്കെ

ഉല്ട്ട.

ഞാൻ 

അന്തം വിട്ട്.

നീയാട്ടെ,

എന്റെ 

മിടിപ്പ് 

ഇരുമ്പ് വിലക്ക്

തൂക്കിവാങ്ങാൻ റെഡി.

3 

അറവുകാരാ,

(അരവുകാരാ)

പെറാത്ത പയ്യിനെത്തന്നെ

നിനക്ക് പഥ്യം;

തുടുത്ത് കൊഴുത്തിരിക്കുമ്പോൾ

കശാപ്പിന് 

ജോർ.

മൂർച്ചയേറിയ കത്തി;

ഇറച്ചിക്ക് നല്ല വില-

പഞ്ചനക്ഷത്രങ്ങൾ

സുലഭം.

4 

മലയിടിച്ചു 

കുളം മൂടി 

പുഴയെ 

കൊന്നുകൊൽക 

അമ്മയെ 

വറുത്ത് 

തിന്നുകൊൽക.

5 

നാളെയിലേക്ക് 

കുതിക്കുന്നവനെ

ഇന്നലെയിലേക്ക് 

ചവിട്ടിത്താഴ്ത്തി

ഓണത്തിനൊരൂണ്-

ബോണസ്

നിന്റെ സൗജന്യം.

നെടുവീർപ്പ് 

പഴയ 

മുടിയൻ 

കാരവരുടെ

വേദാന്തം:

"എന്തു ചെയ്യാം-

എല്ലാം 

ഉല്ട്ട പുല്ട്ട-

ഒക്കെ നാളെ 

ശരിയാകും".

(മൂപ്പര് ദില്ലിയിൽ പോയിട്ടുണ്ട്;

ഇനിയും പോകും.)