അറിയാ വഴികൾ

പീതൻ കെ വയനാട്

--------------------------------

പകൽ ചൂടിൽ പൊള്ളിയോ-

രുടൽ നിനക്കു നീട്ടുമ്പോ-

ളടുക്കള ചൂളയിൽ വെന്ത ഹൃദയം  

നീയെനിക്കു കാഴ്ച വച്ചതു ഞാൻ 

പ്രിയം നുള്ളി ഭക്ഷിക്കെ,

പേരു നാമന്യോന്യം തേനിൽ ചാലിച്ച 

വയമ്പായ് നാവിൽ തൊട്ടു വച്ചേതു 

രസച്ചുഴിയിലകപ്പെട്ടിതോമനേ.....

കരയേറെ ദൂരെയാണപ്പോൾ,വഞ്ചി 

വരുതിയിലല്ലലകൾക്കു മേൽ 

കാറ്റപഹരിച്ചന്യമായൊരു തുരുത്തി-

ന്നോരത്തു നങ്കൂരമിടുവാൻ വിധിക്കുന്നി-

തോർമ്മ തടാകത്തിലിനിയും പച്ചകൾ 

മുളക്കാത്തോരിടമീറൻ പുതക്കുമ്പോ -

ളലിയുന്നൊരു ലവണ ശിലയതിൽ 

ശീലങ്ങൾ മൂർച്ചിച്ചിരുൾ കാട്ടിൽ 

പത്തി വിടർത്താടും സർപ്പം നിന്നെ 

ദംശിക്കെ,നീ വിവശമർദ്ധ ബോധത്തിൽ 

പുലമ്പുന്നതെന്റെ പേരെന്നുന്മാദിയായ് 

ഞാനഹങ്കരിക്കുന്നൂ:പിന്നെ ചന്നം പിന്നം 

രാത്രി മഴയായ് പെയ്തിറങ്ങുന്നൂ,

പേരുകൾ മാഞ്ഞ പേരേടുക-

ളക്കങ്ങളലിഞ്ഞില്ലാതായീടു-

മാവർത്തനങ്ങളടിവരയിട്ട കുറിപ്പു-

കളിലർത്ഥം തെറ്റിയ വാക്കുകൾ,

വർണ്ണങ്ങൾ മാഞ്ഞവ്യക്തമാം ചിത്രങ്ങൾ 

ചിലമ്പിന്നുള്ളിലെ രത്ന കിലുക്കമ്പോൽ

ചിരിയിക്കിളി തോറ്റങ്ങൾ,തോല്ക്കില്ല 

നീയെങ്കിലും തോറ്റെന്ന നാട്യങ്ങൾ,

കാവ്യാനു ഭൂതിയിലിളകിയാടുമുടൽ ഭാഷക-

ളുന്മത്ത  നർത്തനം,നവ്യമാമേടുകൾ 

നര നാരീശ്വര വിസ്മയമുല്പത്തി തന്നഗ്നി 

ഗർഭ വിസ്പോടനം,വിരൽ പൊള്ളി പതിയെ 

മണൽ ചാലിലെഴുത്തുകൾ നിലക്കുന്നു,നീ 

നിദ്രയെ പുൽകുന്നു,ഞാനനാദിയിൽ ശൂന്യ 

നഭസ്സിന്നിരുൾ താഴ്വരകളിൽ തളരും 

പഥികനായ് പഞ്ചേന്ദ്രിയങ്ങളടക്കി 

പതിവു പോൽ,പാതി മെയ്യിൽ നിന്നേറെ 

പണിപ്പെട്ടു ഗാണ്ഡീവം  വലിച്ചിഴക്കുന്നു ,

വഴിയോ വിജനം വില്ലാളി ക്ഷീണിതൻ,

ക്ഷണിക സുഖമെങ്കിലും സുനിദ്രക്കു 

സുഭാഗേ സുരതം കല്പിതം, കാറ്റലക്കുന്നു 

വാതായനങ്ങൾ ക്കപ്പുറമെല്ലാം 

ബാക്കിയുണ്ടെന്നോർമ്മ പെടുത്തുന്നു,

ബധിരനല്ലിപ്പോൾ,മൂകനുമന്ധനുമല്ല ഞാൻ,

പുലരൊളി ജനാലയിളകി

യാട്ടങ്ങൾക്കിടയിലീറനുടുത്തു  നീ-

യിഷ്ട ദേവാർച്ചന കഴിഞ്ഞു കുറിയിട്ടു 

തുളസിക്കതിർ ചൂടിയെന്നത്തെയും

പോലെയൊന്നുമറിയാത്തൊരു 

നൈർമ്മല്യ സ്വത്വം,നിറ ചിരിയോടെ,

നീയെനിക്കിപ്പോഴുമത്ഭുതമോമനേ....

അർക്കനോരോ മണൽ തരിയിലു-

മില തുമ്പിലുമീറൻ തുടിപ്പിലുമേറെ

വെളിച്ചം വിതച്ചാത്മായനം തുടരുക-

യാണെപ്പോഴുമുറങ്ങാതുണരാതെ,

നാം നമ്മുടെ യിഷ്ടഭോഗങ്ങളിലിഷ്ട 

ഭോജ്യങ്ങളിലിത്തിരിപ്പോന്നൊരീ ജന്മ 

ഭാഗ്യങ്ങളിലല്പ മാത്രാഹ്ലാദങ്ങളിൽ,

ആരു നീ-ഞാനുമാരെന്നറിയാത്തൊരീ-

യറിയാ വഴികളിലോമനേയെത്ര ദൂരം,

നമുക്കിടയിലിനി വീണ്ടുമടുത്തറിയാ-

നെത്ര ജന്മ ജന്മാന്തരങ്ങളെന്നോമനേ.....  

--------------------------------------------------------------