ഒരുമിച്ചുപോകാം....

അന്‍വര്‍ ഷാ ഉമയനല്ലൂര്‍ ഭാരതം! നമുക്കഭിമാനതാരകം ജന്മം മഹനീയമായ്‌ത്തന്ന തായ്‌മരം കര്‍മ്മത്തിരകളുയര്‍ത്തേണ്ട സാഗരം ഭക്തിയോടെന്നും നമിക്കേണ്ട ശ്രീലകം പേരിന്നു നാമിന്നു മോടികൂട്ടീടിലും വേരറ്റുപോകാതെ കാക്കേണ്ട പൈതൃകം സ്നേഹം നുകരുവാനുളള ദേവാലയം പാരിതില്‍ ശാന്തി പകരുമീ,യാലയം നേരറിഞ്ഞൊരുപാടുദൂരം നടക്കിലും പോറലേല്‌പ്പിക്കാതിരിക്കേണമേവരും ജന്മഭാഷയ്‌ക്കു,നാമേകും വിലതന്നെ- തുല്യമായ് കര്‍മ്മഭാഷയ്ക്കും കൊടുക്കണം മുളളുകള്‍ക്കൊളളാതൊഴിഞ്ഞൂനടക്കണം കളളങ്ങള്‍ നുളളിക്കളഞ്ഞുമുന്നേറണം സദ്വിചാരങ്ങള്‍ മുളപ്പിച്ചു നന്മകള്‍ നാട്ടിന്‍പുറങ്ങളിലര്‍പ്പിച്ചുകൊളളണം തെളിദീപമാകാന്‍ ശ്രമിക്കുവോര്‍ക്കൊപ്പമീ- ജന്മഗേഹത്തില്‍ പ്രകാശംചൊരിയണം ജാതിത്തിമിരം പകര്‍ന്നിടാതെന്നുമേ- യൊത്തൊരുമിച്ചുനാം ശുദ്ധിവരുത്തണം വരിക! സഖേ, നമുക്കറിവിന്‍ തിരിനാള- മണയാ,തിനിമേ,ലണിചേര്‍ന്നു നീങ്ങിടാം.