സജീവ് അയ്മന
വഴിയിറമ്പിൽ കാണുന്നു:
ആരും തൊടാതെ നിൽക്കുന്ന
തൊട്ടാവാടികളുടെ ഒരു പൂന്തോട്ടം
വയലറ്റുപൂക്കളുടെ ഈ കാഴ്ചയിൽ നിന്നായിരുന്നു
പുതിയ കവിത എഴുതി തുടങ്ങിയത്
നാളെ ആ വഴിയേ പോകുമ്പോൾ
ആ പൂക്കളെ ഒന്നുകൂടികാണണം
ഇന്ന്, കവിതയുടെ അവസാനത്തെ വരിയെക്കുറിച്ചാലോചിച്ച്
അവ നിന്നിടത്തെത്തുമ്പോൾ
കുറ്റിയിൽകിടന്ന്
ഒരു ആട് അയവിറക്കുന്നു...
പിന്നെ ആലോചിച്ചതേയില്ല
ആട് എഴുതികഴിഞ്ഞല്ലോ!
അവസാനത്തെ വരി.
