ഷൈൻ ടി.തങ്കൻ
ഞാന്‍ തേടുകയാണ്
പൊഴിയുമിലകളില്‍ നിന്നകന്ന്
തളിര്‍ക്കുമിലകളിലേക്ക് പടരുമൊരു
കാറ്റുപോല്‍………
കാറ്റായി വീശുവാനറിയാ കാലത്ത്
ഗതിവേഗമെന്നില്‍ നിറച്ചൊരു
തളിരിലായാണിന്നുമെന്നില്‍
വസന്തമായി പൂത്തു ,കാടായി പടരുന്നവള്‍
പിന്നില്‍ നിന്നൊരു പുഴു കുത്തേറ്റു
എന്നിലൂടൊഴുകി വീണവള്‍ .
അന്നാദ്യമായ്‌ ഞാനൊരു കൊടുംങ്കാറ്റായി
ആടിത്തിമിര്‍ത്തു ,മേഘങ്ങളെ കുലുക്കി
പെയ്യിച്ച് ഇടി താളം മുഴക്കിച്ചു .
ഇപ്പൊഴീ ആകാശ ചെരുവില്‍
ആലോലങ്ങളില്ലാതെ, ഇമകളനങ്ങാതെ
കാത്തിരിക്കുന്നൊരീ ഞാന്‍
ചെറു നാരുകളായി മണ്ണിലലിഞ്ഞ്
വേരിലൂടെ കുതിച്ചെത്തി തളിര്‍ക്കുമൊരു നാളിനായി
