ഷൈൻ ടി.തങ്കൻ
നീ തരാതെ പോയ നിന്റെ മകള്‍
എന്റെ മനസ്സിന്റെ തീരത്ത്
നിനക്കായി വെളുത്ത ചോറില്‍
കറുത്ത എള്ളും ചേര്‍ത്തുരുട്ടുന്നു.
വിറയ്ക്കുന്ന ചുണ്ടുകളില്‍ നിന്നടരുന്നത്
നിനക്കുള്ള മോക്ഷ ജപങ്ങള്‍ .
കാക്കയായി വന്നു കൊത്തുന്നു നീ
കള്ള നോട്ടം നോക്കിയെങ്ങോ
പറക്കുന്നു വീണ്ടും
കൊത്തിയ കൊത്തെല്ലാം ചങ്കില്‍
തറച്ച് ഞാന്‍ ,കര്‍ക്കിടക തുള്ളിയില്‍
അലിഞ്ഞു കരഞ്ഞിടുന്നു .
ഇപ്പോളുമൊടുങ്ങാതെ കത്തുമെന്‍
പ്രണയമല്ലാതെ ഇല്ല,
നിനക്കായെനിക്കൊരു ബലി
