ഷീല
കവിതപോൽ വന്നു നിറഞ്ഞൊരു കാലവും
കഥകളിൽ മിന്നും തിളക്കവുമില്ലാതെ,
വന്നുപോയ്‌ ഓണമിന്നോർമ്മയിൽ പോലു-
മൊരുഞ്ഞാലും ഓണക്കളികളുമില്ലാതെ
പൂവുകൾ തേടിയലയുന്ന കുട്ടികളെന്തേ-
വരാത്തതെന്നാകുലപ്പെട്ടുകൊണ്ടു
ക്കോലായിൽ കാത്തിരിക്കുന്നൊരാ-
മുത്തശ്ശിയുമില്ലായിന്നൊരു വീട്ടിലും.
സദ്യയൊരുക്കുവാനുത്രാടം തൊട്ടേ നട്ടെല്ലു-
നീർക്കാതടുക്കളയിൽ തന്നെ നട്ടം
തിരിയുന്ന അമ്മമാരേയും കണ്ടു
കിട്ടീടില്ല നമ്മൾക്കൊരിടത്തും.
പഴയൊരോർമ്മതൻ പടിവാതിലിൽ
ഞാൻ പതറി നിന്നുപോയ്‌ തെല്ലുനേരം;
പാടി പഴകിയ പാട്ടുകളോർമ്മയിൽ
നെടുവീർപ്പുകളായ്‌ മാറുന്നു...
