അടുക്കള

ശിവപ്രസാദ്‌ താനൂർ     കരിപിടിച്ചുറച്ച ചുമര്‌     അരഞ്ഞുതേഞ്ഞ അമ്മി     വീതനത്തിണ്ണയിൽ     കെട്ടും കെടാതെയും     പാട്ട വിളക്ക്‌.     ഉപ്പുമാങ്ങ നിറച്ച     ചീനഭരണി,     നനഞ്ഞ വിറക്​‍്‌     ഊതിയൂതി     കനലെരിച്ച്‌     നെഞ്ചെരിച്ച്‌     കരിവാളിച്ച മുഖവുമായി     അമ്മ.....     സ്നേഹത്തിന്റെ     സഹനത്തിന്റെ     സാന്ത്വനത്തിന്റെ ആൾരൂപം............     സാരിത്തുമ്പ്‌ -     അഭയ കേന്ദ്രം.     ഇതായിരുന്നു.......അടുക്കള.     പാളപിരിച്ചുടച്ചു തീർത്ത     തെരികയിൽ അടച്ചുവെച്ച     കുഞ്ഞുപാത്രം.     അതിൽ എപ്പോഴും ബാക്കി     ഒരു പിടി വറ്റ്‌............... മക്കൾക്ക്‌ .     ഇന്ന്‌ മാർബിളുകൾ തീർത്ത കിച്ചൺ     മൈക്രോ വേവ്‌ ഓവൺ     മുഖത്ത്‌ ചായം തേച്ച വേലക്കാരി.     ചൈനീസ്‌ ഭക്ഷണത്തിന്റെ     പിടികിട്ടാത്ത ഗന്ധം     എൽ ഇ ഡി ബൾബുകൾ     നിറം മാറ്റിയ ഭക്ഷണം     പുതിയ റസിപ്പിക്കായുള്ള     അന്വേഷണം........     അവശേഷിക്കുന്നവ സൂക്ഷിക്കാൻ     ഫ്രിഡ്ജെന്ന മോർച്ചറി.     ഇന്നും അടുക്കളകൾ ഉണ്ട്‌ :     അമ്മയില്ലാത്ത കിച്ചണുകളായി......