ഗീതാകുമാരി
ഒറ്റച്ചിലമ്പ് കിലുക്കി കാലത്തിന്റെ
ഗര്ജ്ജനമാകുന്നു ഗദ്ദര് !
ഗദ്ഗദം വന്നു നിറയുന്നു ,നിന് -
ഗാന നിര്ജ്ജരി കേള്ക്കുന്ന മാത്രയില് !
ആ ദളങ്ങള് ,ദളിതര് തന് രോദനം
മാറ്റൊലിക്കൊള്ളുന്നു നിന്നില്
ഏതു പടഹധ്വനിയായ് ,പടവാളായ്
പോരാടി ,ചാട്ടുളിയായി .....
കാറ്റിന് പ്രചണ്ഡന താളമായ് ,
ആയിരം സാഗരഗര്ജ്ജന നാദമായ്
ഹൃത്തിന്റെ ഉള്ളറ കീറി ,പ്രകമ്പനം
കൊള്ളുന്നു കാവ്യ കല്ലോലിനി ......
ഉള്ളിലണയാത്ത തീപ്പൊരിയൂതി-
ചലനത്തിന് ,അഗ്നിയങ്ങാളിപ്പടര്ത്തി
'പോരാട്ട'മെന്തെന്നു കാട്ടി നീ ,ഇന്നിന്റെ
'കണ്ണകി' യായുറഞ്ഞാടി
'വിറ്റലിന്'നാമമുപേക്ഷിച്ചു ,മാറ്റത്തിന്
വിത്തുവിതയ്ക്കുന്നു നീയും
'വിപ്ലവം'അര്ഥങ്ങള് തെറ്റി ,ഉറയൂരി
നിശ്ചലമാകുന്നു മുന്നില് !
ഭാഷ്യം ചമയ്ക്കുന്നു നീയും ,ചെഞ്ചോര
ചീറ്റുന്നു നിന് നെഞ്ചിലിന്നും !
ഈ 'പുറംപൂച്ചി'ന് യുഗത്തിന്റെ -
-യപ്പുറം കണ്ടവന് ,ഗദ്ദര്
നിന് മുളവടി തുമ്പില് ,സ്ഫുരണമായ്
നിന്നു ജ്വലിക്കട്ടെകാലം !!
