പ്രകൃതിപാഠം

സന്തോഷ്  പല്ലശ്ശന 

ചിറകുകള്‍ കുടഞ്ഞുകളഞ്ഞ്
ഉറുമ്പുകളാകുമത്രെ
ഈ മഴപ്പാറ്റകള്‍.

ഉണ്ണീ...
'പറവി'യിലെ
ആകാശോല്ലാസങ്ങളെ
ജന്മനിയോഗമറിഞ്ഞ്,
അഴിച്ചുവയ്ക്കുകയാണത്.

അരിച്ചുതന്നെ തീരേണമെന്ന
ജീവിതാരിഷ്ടങ്ങളിലേക്ക്
ചിറകുപൊഴിക്കുകയാണത് !

അതിനും വേണം വിളക്ക്
അറിവിന്റെ ചൂട് !

ചിറകുകളുണ്ടായിട്ടും
തലയിട്ടടിക്കുന്ന
തലതിരിഞ്ഞ പ്രാണികള്‍
ഇനിയും വരും.

ഉണ്ണീ...
വിളക്കൂതിക്കിടന്നോളൂ...

ചില ക്രിമിനല്‍ ദിവാസ്വപ്‌നങ്ങള്‍

സന്തോഷ് പല്ലശ്ശന

ഇന്നലെ മാര്‍ക്കറ്റില്‍ വച്ചല്ലെ
ഇവനെ കാര്‍ക്കിച്ചു തുപ്പിയത്.

പെടോള്‍ പമ്പിനു മുന്നിലിട്ട്
ഒരു നൂറു വെട്ടെങ്കിലും വെട്ടിയതല്ലേ...!!
എന്റെ മകന്റെ സ്‌കൂള്‍ ഫീസടച്ച് വരുന്ന വഴിക്ക്
സിഗ്നലും കാത്ത് കിടക്കുമ്പോള്‍
എം.ജി. റോഡിലിട്ട് പല്ലുംഞെരിച്ചൊരു കശക്ക് കശക്കിയതാ....

രാവിലെ പത്രം വായിച്ച് മടക്കിവെച്ചപാടെ
അന്ത്യകൂദാശ ചെയ്തതാ....

ഹെന്നിട്ടിപ്പോ....!!
ദേ ഇപ്പോ.. ടീവീല്....!!
ഒബാമയ്‌ക്കൊപ്പം..!!!
കൈകൊടുക്കുന്നു..
കെട്ടിപ്പിടിക്കുന്നു...
മുത്തംകൊടുക്കുന്നു....!!
എന്റെമഷിയിട്ട പേനകൊണ്ട് പേരെഴുതി
ഒപ്പിടുന്നു...!!!

ഒക്കെ സ്വപ്‌നമായിരുന്നല്ലെ... ദിവാ..........സ്വപ്‌നം.... !!!

''മടക്കിവയ്ക്കടാ നിന്റെ മറ്റേടത്തെ ദിവാസ്വപ്നം'
എന്നൊരാള്‍ വന്ന് വാതിലില്‍ മുട്ടുന്നു...